Hafið þökk fyrir sumarið

Nú er 15. Listasumri á Akureyri lokið.

Í ár heimsóttu í kringum 3500 manns að minnsta kosti 25 sýningar og viðburði yfir 50 listamanna.

Einn af hápunktum sumarsins voru að sjálfsögðu lokin, en Akureyrarvakan var venju fremur glæsileg. Opnun á sýningunni "Skyldi' ég vera þetta sjálfur!", sem er samsýning 21 listamanns um Jónas Hallgrímsson, sló aðsóknarmet á fyrsta klukkutímanum og nú þegar hafa um 1000 manns sótt sýninguna sem stendur enn og mun standa til 23. september. Við mælum eindregið með því að fólk kíki við í Ketilhúsinu til að kynnast þeirri arfleifð sem Jónas lætur eftir sig því áhrif hans ná svo sannarlega að spanna stórt svið.

Við þökkum öllum sem sóttu hátíðina hjartanlega fyrir komuna og vonumst til að sjá ykkur flest aftur að ári.

Lifið heil!

Starfsfólk Listasumars.

Walter Laufenberg

Þessa stundina dvelur rithöfundur í gestaíbúðinni í Davíðshúsi. Hann heitir Walter Laufenberg og kemur frá Þýskalandi. Walter hefur skrifað og gefið út yfir 20 skáldsögur og er vel þekktur í heimalandi sínu og víða um heim. Hann heldur úti tímariti á internetinu, og hefur gert síðustu 11 ár, sem fólk frá yfir 70 löndum heimsækir á degi hverjum. Slóðin þangað er www.netzine.de 

Næstkomandi fimmtudag verður lesin saga eftir Walter í íslenskri þýðingu, og sungin ljóð eftir Davíð Stefánsson í þýskri þýðingu Walters. Hjörleifur Hjartarson sér um sönginn og leikur undir á gítar.

Þessi viðburður verður í Populus Tremula klukkan 20:00 annað kvöld. Aðgangur er ókeypis og malpokar leyfðir eins og venjan er í húsinu. Eftir á gefst fólki færi á að ræða við rithöfundin, en samkvæmt reynslu þeirrar sem þetta ritar er það ákaflega gefandi og fróðlegt.

Tónlistin í náttúrunni

Síðustu jazz tónleikar sumarsins marka upphaf endaloka Listasumars í ár, en þótt endalokin nálgist er enn margt að sjá. Sýningin "Sprotar í myndlist" hangir enn uppi í Deiglunni, Arna Vals er ennþá "Í hljóði" og lotningu í Ketilhúsinu og Akureyrarvakan, hápunktur sumarsins, er stutt undan.

Á þessum síðasta Heita fimmtudegi sumarsins verður boðið upp á samspil náttúruljósmynda og jazztóna, en það er Kvartett Dorthe Höjland sem flytur okkur ljúflega inn í haustið. Tekið skal fram að tónleikarnir eru að þessu sinni haldnir í Ketilhúsinu og hefjast klukkan 21:30, að vanda. Aðgangseyrir er 1000 krónur og enn er hægt að kaupa afsláttarkort; sex tónleika á 3000 krónur sem nýtist einnig næsta sumar.

Föstudagshádegistónleikarnir verða í Ketilhúsinu kl. 12:00 og bera  yfirskriftina "Frá norðri til suðurs". Hanna Friðriksdóttir sópran syngur og Jón Sigurðsson leikur undir á píanó. Aðgangseyrir er 1000 krónur.

Myndin hér til hliðar er ein af myndunum sem búast má við að verði sýndar á fimmtudaginn.

Komið og njótið!

Aðsóknin á viðburði síðustu viku var með eindæmum góð. Myndir eru væntanlegar von bráðar. Við vonum að fólk hafi skemmt sér vel og bjóðum ykkur velkomin á tónleika vikunnar sem eru eftirfarandi:

•  Heitur fimmtudagur í Deiglunni: Kvartett Ásgeirs Ásgeirssonar. Ólafur Jónsson á saxófón, Ásgeir Ásgeirsson á gítar, Þorgrímur Jónsson á kontrabassa og Erik Qvick á trommur. Þess má geta að tónleikarnir sem þeir félagar Erik Qvick og Þorgrímur Jónsson hafa leikið á í sumar slaga hátt í tíu. Þeir eru alltaf jafn hressir og þessir tónleikar verða án alls vafa nærandi fyrir líkama og sál.  Miðaverð er 1000 krónur og tónleikarnir hefjast klukkan 21:30. Látið ykkur ekki vanta!
  
• Föstudagshádegistónleikarnir: Þeir verða á sama stað og tíma og venjulega; Ketilhúsinu klukkan 12 á hádegi. Að þessu sinni mun Björg Þórhallsdóttir, sópran, syngja fyrir gesti og Daníel Þorsteinssonleika undir á píanó. Tónleikarnir bera yfirskriftina "Íslensk rómantík". Og hvað er betra á síðsumri en einmitt íslensk rómantík? Þetta verður dásamlegt.

Við vonumst til að sjá ykkur sem flest!

Spennandi dagskrá

Hér er dagskrá næstu daga. Akureyri er klárlega staðurinn til að vera á um Verslunarmannahelgina.

Fimmtudagurinn 2. ágúst:

• Heitur fimmtudagur verður í Ketilhúsinu að þessu sinni. Hin ofurvinsæla Ragnheiður Gröndal ásamt hljómsveitinni Black Coffee spila og syngja fyrir gestina. Tónleikarnir hefjast sem fyrr klukkan 21:30 og aðgangseyrir er 1000 krónur. Ekki missa af þessu!

 

 

 

Föstudagurinn 3. ágúst:

• Föstudagshádegistónleikar í Ketilhúsinu: Að þessu sinni er það hinn einstaki söngvari Heimir Bjarni Ingimarsson, baritón, sem við þekkjum öll, sem ætlar að gleðja okkur með söng sínum. Helga Bryndís Magnúsdóttir leikur undir á píanó og það verður gaman að sjá hvort henni takist að slá annað aðsóknarmet í sumar, nú með Heimi sér við hlið.
  
• Föstudagsfjör í Deiglunni: Klukkan 21:00 mun hljómsveitin Skrokkabandið stíga á stokk í Deiglunni og halda þar 20 ára afmælistónleika. Hljómsveitina skipa þeir Kristján Pétur Sigurðsson og Haraldur Davísson ásamt hjálparsveit Populus Tremula.

Laugardagurinn 4. ágúst:

• Ketilhús kl. 14:00: Arna G. Valsdóttir opnar sýningu sína "Í hljóði". Allir eru boðnir velkomnir. Sýningin stendur til 19. ágúst.
  
• Laxárvirkjun í Aðaldal kl. 15:00: Brasskvintett Norðurlands heldur tónleika. Í leiðinni er hægt að skoða og njóta sýningarinnar "Lífströll" eftir Sveinbjörgu Ásgeirsdóttur.

 

 

 

 

• Deiglan kl. 15:00: Sýningin "Sprotar í myndlist" opnar. Myndlistarkonurnar Aðalbjörg Kristjánsdóttir, Charlotta Þorgilsdóttir, Inga Björk Harðardóttir, Sveinbjörg Ásgeirsdóttir og Unnur Óttarsdóttir, nýútskrifaðir nemendur úr Myndlistaskólanum á Akureyri, sýna. Sýningin stendur til 19. ágúst.

 

 

 

Bærinn verður iðandi af lífi um Verslunarmannahelgina og nóg um að vera allsstaðar. Við hvetjum sem flesta til að nota tækifærið og njóta menningarinnar sem blómstar á Akureyri sem aldrei fyrr.

Metaðsókn á föstudagshádegistónleika!

Hinir klassísku ljóðatónleikar Eyrúnar Unnarsdóttur og Helgu Bryndísar Magnúsdóttur á föstudaginn síðasta voru einstaklega vel heppnaðir. Á annað hundrað manns mættu og voru fagnaðarlætin svo mikil í lokin að þær urðu að gjöra svo vel að taka aukalag og svo annað á eftir því.

Eyrún er á öðru ári í tónlistarskólanum í Vínarborg og á fjögur á eftir. Ef marka má viðtökurnar á föstudaginn er framtíðin björt hjá þessum unga og upprennandi listamanni. Helga Bryndís Magnúsdóttir er flestum kunn, enda er hún einn af bestu píanóleikurum landsins, og saman tókst þessum tveimur að slá aðsóknarmet á föstudagshádegistónleikana í sumar.

Við óskum þeim stöllum til hamingju með góða tónleika og vonum að sem flestir haldi áfram að koma og fleiri bætist í hópinn.  

En næsta vika verður spennandi, meira um það á morgun..

 

Hin vikulega tilkynning

Jæja, tíminn flýgur áfram og nú er Listasumar hálfnað. Við erum þó enn á blússandi siglingu og viðburðirnir hlaðast upp. Það sem gerist á næstunni er þetta:

• Heitur fimmtudagur í Deiglunni: Það eru að sjálfsögðu heitir tónleikar í Deiglunni annað kvöld. Tríó Sunnu Gunnlaugsdóttur mun leika fyrir gesti. Sunna spilar sjálf á píanó, Scott McLemore á trommur og Þorgrímur Jónsson á kontrabassa
  
• Föstudagshádegistónleikar: Tónleikarnir eru glæsilegir að vanda. Það verða Klassískir Ljóðatónleikar, hvorki meira né minna, þar sem Eyrún Unnarsdóttir mezzósópran syngur og Helga Bryndís Magnúsdóttir leikur undir á píanó.
  

Við hlökkum til að sjá ykkur.

Nýjar myndir

 Vildum benda á við bætum reglulega við í myndaalbúmin hér til vinstri. Röðin á þeim er þessi:

• Jónsmessuhátíðin í Kjarnaskógi
• Heitir fimmtudagar í Deiglunni
• Föstudagshádegistónleikar í Ketilhúsi
• Sýningar

Njótið

Tónleikar og tónleikar

Enn og aftur er sjóðheitur fimmtudagur í nánd. Að þessu sinni mun hljómsveitin Bon Som spila fyrir okkur. Hljómsveitina skipa þeir Andrés Þór Gunnlaugsson á gítar, Eyjólfur Þorleifsson á saxófón, Þorgrímur Jónsson á kontrabassa og Scott McLemore á trommur. Á myndinni má sjá hljómsveitina leika á útgáfutónleikum vegna disks sem þeir gáfu nýlega út, á skemmtistaðnum Domo á Þingholtsstræti í Reykjavík.

Síðustu Föstudagshádegistónleikar í Ketilhúsinu vöktu heilmikla athygli og var salurinn ekki lengi að fyllast eftir að húsið var opnað. Fólk var almennt himinlifandi með tónleikana enda var þar heimsklassa tónlistarfólk þar á ferð.

Tónleikarnir næsta föstudag eru ekki síðri en þá ætlar Dúóið Paradís að sýna listir sínar. Hafdís Vigfúsdóttir spilar á flautu og Krisján Karl Bragason leikur á píanó. Tónleikarnir hefjast klukkan 12:00 og standa í um það bil 50 mínútur. Það er fátt meira hressandi en að taka smá forskot á helgina gera sér glaðan dag strax í hádeginu á föstudögum. Fólk mætir síðan endurnært í vinnuna eftir hádegið og er enn betur í stakk búið að njóta helgarinnar en ella.

Miðaverð á tónleikana er 1000 krónur á hvorn og miðar eru seldir við innganginn.

Við minnum á sýningarnar sem opnaðar voru í Deiglunni og Ketilhúsi síðastliðinn laugardag. Þær standa enn og er opnunartíminn frá klukkan eitt til fimm alla daga nema mánudaga.

Verið hjartanlega velkomin.

 

Dagskrá vikunnar

Við þökkum öllum sem heimsóttu skáldahúsin í gær kærlega fyrir komuna og viðkynninguna. Það var gaman hversu margir létu sjá sig.

Dagskrá vikunnar er ekki af verri endanum, enda alltaf líf og fjör á Listasumri.

Fimmtudagur 12. júlí:

• Heitur fimmtudagur í Deiglunni: The Story of Modern Farming: Jessica Sligter, á hljómborð, flautu og gítar, Louise Jensen á alt sax og Hilmar Jensson gestaleikari á gítar. Tónleikarnir hefjast kl. 21:30 og miðar og afsláttarkort verða seld við innganginn. (Myndin er tekin af www.jessicasligter.com)

 

 

Föstudagur 13. júlí:

• Föstudagshádegistónleikar í Ketilhúsi kl. 12:00: "All American - Live from New York." Söngkvartett Metropolitan óperunnar í New York: Consande Green, sópran, Ellen Land, mezzo, Irwin Reese, tenór, John Shelhart, bass-baritón og Robert Rogers, píanó.

 

 

Laugardagur 14. júlí:

• Ketilhús kl. 14:00: Opnun á tveimur sýningum: Í aðalsal opna Jóna Hlíf Halldórsdóttir og Kristina Bengtson sýninguna "Make it big or keep it simple". Á svölum opnar Bjargey Ingólfs sýninguna "Þræðir". Báðar sýningarnar standa til 29. júlí.
• Deiglan kl. 15:00: Opnun á sýningu myndverka Unu Berglindar Þorleifsdóttur. Þessi sýning stendur einnig til 29. júlí.

Ekki missa af neinu af þessu!