Safnadagur í dag!

Við hvetjum alla sem hafa löngun til að minnast þjóðskáldanna Davíðs Stefánssonar og Matthíasar Jochumssonar að heimsækja húsin þeirra í dag.

Davíðshús er að Bjarkarstíg 6. Ef keyrt er niður Þórunnarstræti, rétt áður en komið er að lögreglustöðinni, má sjá skilti á hægri hönd sem vísar veginn þangað. Þar er opið frá kl.13:00 til 14:30.

Sigurhæðir eru í brekkunni fyrir neðan Akureyrarkirkju. Það er hægt að leggja bílnum sínum í Hafnarstræti, til að mynda við gamla Tónlistarskólann og labba upp tröppurnar sem þar eru. Eða ganga kirkjutröppurnar (upp eða niður, fer eftir því í hvernig skapi fólk er) og beygja þá til vinstri eða hægri (fer eftir því hvort fólk labbar upp eða niður tröppurnar) á lítinn stíg sem liggur að húsinu. Þar er opið frá kl. 15:00 til 17:00.

Það er algerlega og að öllu leyti ókeypis í söfnin í dag og kleinur og kaffi verða í boði hússins fyrir alla sem láta sjá sig.

Dagskrá Safnadagsins má finna hér.

Verið hjartanlega velkomin.  

Vel heppnuð helgi og önnur slík framundan

Við erum alltaf að læra eitthvað nýtt. Andlegar framfarir fást ekki síst með því að umgangast andans fólk og skapandi sálir og því mega það teljast forréttindi að fá að njóta ávaxta hinna skapandi á sýningum og tónleikum eins og þeim sem boðið er upp á, á Listasumri í sumar.

Síðasta fimmtudagskvöld var húsfylli í Deiglunni þegar hljómsveitin Hrafnaspark, ásamt Grími Helgasyni á klarinett lét ljós sitt skína. Gleðin ljómaði út hverju andliti og vafalítið munum við sjá góðan hluta þess fólks sem þar var á tónleikunum, á Heitum Fimmtudegi annað kvöld, en þá mun hljómsveitin Narodna Musika leika búlgarska þjóðlagatónlist fyrir gesti. Hljómsveitina skipa Haukur Gröndal á klarinett, Borislav Zgurovski á harmóníku, Enis Ahmed á tamboura, Þorgrímur Jónsson á kontrabassa og Erik Qvick á trommur.

Haukur Gröndal hefur um árabil kynnt sér hina fjölbreyttu þjóðlagatónlist Austur- Evrópu og býðst fólki nú að njóta ávaxta þeirrar vinnu hans. Undirrituð hvetur alla til að mæta á tónleikana því hún veit af eigin reynslu að fátt fær lífið til að þjóta eins um æðarnar og vekur eins sterka löngun til að dansa og þjóðlagatónlist frá Balkanskaganum.

Á hádegistónleikunum síðustu lék hljómsveitin Pi-Kap fyrir gesti og voru allir sem á hlýddu á einu máli um að tónleikarnir hefðu verið yndislegir. Enginn ætti að láta næstu hádegistónleika fram hjá sér fara því þá ætla Hlöðver Sigurðsson, tenór og Þórunn Marinósdóttir, sópran að syngja.

 

 

Hljómsveitin Pi-Kap í Ketilhúsinu. 

Af síðasta viðburði síðustu helgar er þetta að segja: Fjölmargir voru viðstaddir opnun á málverkasýningu Jóhönnu Friðfinnsdóttur í Deiglunni á laugardag. Sýningin stendur til 8. júlí og að virða hana fyrir sér er kjörin leið til að vekja þá gleði og kyrrð sem býr innra með okkur öllum.

Verið velkomin, við hlökkum til að sjá ykkur!

 

Gestir á opnuninni.

Jónsmessuhátíðin og dagskrá næstu viku

Á laugardaginn var Jónsmessuhátíð haldin í Kjarnaskógi. Þar sýndu börnin sem tóku þátt í barnasmiðjunum Þjóðhetjur og -skörungar afrakstur vikunnar og margt fleira skemmtilegt átti sér stað. Myndirnar birtast mjög fljótlega. 
Í þessari viku ber þetta þó hæst:

Fimmtudagurinn 28. júní:

• Heitur fimmtudagur í Deiglunni. Hljómsveitin Hrafnaspark leikur fyrir gesti, ásamt Grími Helgasyni á klarinett. Tónleikarnir hefjast klukkan 21:30.

Föstudagurinn 29. júní:

• Hádegistónleikar í Ketilhúsi. Strengjakvartettinn Pi-Kap frá Tékklandi; Martin Kaplan, fiðla, Lenka Simandlová, fiðla, Miljo Milev, lágfiðla, Petr Pitra, selló og Eydís Franzdóttir gestaleikari á óbó. Tónleikarnir hefjast klukkan 12:00.

Laugardagurinn 30. júní:

• Deiglan. Opnun á málverkasýningu Jóhönnu Friðfinnsdóttur klukkan 14:00. Sýningin stendur til 8. júlí

Listasumar komið á fullt

Listasumar var formlega sett við hátíðlega athöfn í Lystigarðinum síðast liðinn miðvikudag. Elín Margrét Hallgrímsdóttir, formaður stjórnar Akureyrarstofu setti hátíðina og svo tóku tveir Hundar í óskilum sig til og fluttu Gunnarshólma, eftir Jónas Hallgrímsson, frá upphafi til enda á frumlegan og heillandi hátt. Það atriði markaði upphaf ljóðasýningarinnar "Jónas í Lystigarðinum" sem standa mun í allt sumar.

Arna G. Valsdóttir sat á bekk einum í garðinum og seiddi til sín gesti og gangadi með fögrum söng, en hún söng ljóðið Ferðalok eftir Jónas. Eins og vitað er, er Ferðalok eitt frægasta ástarljóð okkar Íslendinga. Ekki er fráleitt að ætla að einhverjir hafi orðið ástfangnir af Örnu þarna í garðinum, svo vel tókst henni til við flutninginn.

Arna G. Valsdóttir í fullum skrúða.

Fjölmennt var á opnuninni og fólk gæddi sér á veitingum af gnægtaborði náttúrunnar og naut sín hið besta.

Veðrið var prýðilegt.

Í gær gerðist tvennt:

Fyrstu jazztónleikar Deiglunnar voru haldnir. Hljómsveitin Jazz Sendiboðarnir sýndu snilli sína og er óhætt að segja að þeir hafi slegið í gegn. Þessi tónleikar eru þeir fyrstu í röðinni á lengstu jazzhátíð landsins, en fimmtudagarnir í Deiglunni verða heitir í allt sumar.

Og sýning Leirlistafélags Íslands, "Vösumst", var opnuð í Ketilhúsinu. Fjölmargir mættu til að kynna sér það heitasta í leirvasagerð á Íslandi í dag. Sýningin verður opin alla virka daga nema mánudaga frá eitt til fimm til 8. júlí.

Gestir á opnuninni.

Gleðilegt listasumar, gott fólk og verið velkomin til Akureyrar.

AlheimsHREINgjörningur hinn þriðji

Anna Richards hefur hreingjört heiminn árum saman og ekki veitir af. Til að skila enn meiri árangri hefur hún síðustu þrjú ár boðið konum og körlum víðs vegar að úr veröldinni að taka þátt.

Nú er komið að þriðja Alheimshreingjörningnum, þar sem verk og gjörningar allra þjóða hreingjörningakvenna og karla koma saman og magna áhrifin. Í ár hefur hún fengið í lið með sér, auk annarra, Ragnhildi Gísladóttur, sem mun spinna rödd sína í fléttu við hreingjörning Önnu, Mardallarsystur Önnu, sem vinna að því að endurheimta týndan og falinn menningararf kvenna, sýna verk og leiða helgan gjöning þar sem goðin fornu verða kölluð til baka úr fossinum undir handleiðslu Valgerðar H. Bjarnadóttur.

Látið þennan einstaka viðburð ekki fara framhjá ykkur og mætið á Þorgeirskirkju við Ljósavatn í kvöld kl. 21:00.

Fyrsta vika listasumars

Verið velkomin á heimasíðu listahátíðarinnar Listasumar á Akureyri. Síðunni er ætlað að vera upplýsandi fyrir njótendur hátíðarinnar og verður dagskrá hverrar viku fyrir sig færð inn jöfnum höndum, að jafnaði í upphafi vikunnar. Hér til vinstri verður komið fyrir tengli sem ber nafnið "Viðburðir" og verður þar hægt að  skoða dagskrá sýninga og viðburða sem haldnir verða á Akureyri og í nágrenni í sumar. Listasumar verður sett þann 20. júní og er dagskrá fyrstu vikunnar sem hér segir:

Mánudagurinn 18. júní:

·       "Þjóðhetjur og -skörungar"; listasmiðjur fyrir börn í tengslum við Jónsmessuhátíð:
~ Í smiðjunum í ár verður unnið útfrá Njálu í endursögn Brynhildar Þórarinsdóttur. Hugmyndin er sú að börn og listamenn/vísindamenn/sérfræðingar á ýmsum sviðum vinni saman að því að rannsaka samskipti og tengsl fólks að fornu og nýju. Smiðjurnar eru fyrir börn aldrinum 9 til 16 ára og þeim lýkur með sýningu í Kjarnaskógi í vikulokin. Börnunum stendur til boða að vera hálfan daginn eða allan daginn og er þetta kjörið tækifæri fyrir þau að kynnast lífinu og listinni og örva sköpunargleðina. Skráning stendur enn yfir í síma 466 2609 eða 824 6609.

 Miðvikudagurinn 20. júní:

 ·       Setning Listasumars í Lystigarðinum kl. 16:00: 
~ Opnun á ljóðasýningunni "Jónas í Lystigarðinum". Hundur í óskilum og Arna G. Valsdóttir flytja ljóð eftir skáldið, Jónas Hallgrímsson, á sinn einstaka hátt. Ljóðasýningin stendur í allt sumar.

 Fimmtudagurinn 21. júní:

  ·       Opnun í Ketilhúsi kl. 17:00:
~ Sýning Leirlistafélags Íslands; "Vösumst". Sýningin stendur til 18. júlí. 

 ·       Heitur fimmtudagur í Deiglunni kl. 21:30:
~ Jazz sendiboðarnir hleypa lífi í Deigluna. Á trompet leikur Snorri Sigurðsson, Ólafur Jónsson á saxófón, Agnar Már Magnússon á trompet, Þorgrímur Jónsson á bassa og Erik Qvick á trommur.  

Laugardagurinn 23. júní:

·       Jónsmessuhátíð í Kjarnaskógi kl. 19:00 til 22:30:
~ Sýndur verður afrakstur vinnustofanna “Þjóðhetjur og -skörungar” sem staðið hafa yfir alla vikuna. Auk þessa verður ótal margt um að vera víðsvegar í skóginum og boðið verður upp á grillmat. Kjörið tækifæri til að fara með fjölskylduna í skóginn og njóta lífsins í samfélagi við skapandi fólk.